Dünyanın ən çox gözlənilən moda tədbirlərindən biri olan “Victoria’s Secret Fashion Show” 2026-cı il oktyabrın 18-də Kaliforniyanın Los-Anceles şəhərində keçirilib. Əfsanəvi podium şousu bu dəfə də məşhur modelləri, diqqətçəkən səhnə obrazlarını, musiqili çıxışları və brendin simvoluna çevrilmiş mələk qanadlarını bir araya gətirib. Bella və Gigi Hadid bacılarından Adriana Limaya qədər tanınmış modellərin iştirak etdiyi gecənin musiqi proqramında isə Megan Thee Stallion, Tate McRae, KATSEYE və Megan Moroney çıxış edib.
Sony Pictures Studios-da təşkil olunan tədbir Victoria’s Secret-in ənənəvi dəbdəbəsini müasir moda və pop-mədəniyyət elementləri ilə birləşdirib.
Bu ilki şounun əsas fərqlərindən biri isə kolleksiyanın dörd fəsil konsepsiyası ətrafında qurulması olub. Dörd fəsil, fərqli obrazlar və unudulmaz podium… Şounun yaradıcı konsepsiyası Victoria’s Secret-in icraçı kreativ direktoru Adam Selman tərəfindən hazırlanıb. Podiumda yaz, yay, payız və qış fəsillərindən ilhamlanan obrazlar nümayiş etdirilib. Qış mövzusu üçün iki fərqli hissənin ayrılması isə şounun vizual müxtəlifliyini daha da artırıb. Bu bölmələrin arasında brendin gənc auditoriyaya yönəlmiş və aktual PINK xətti üçün ayrıca seqment də yer alıb.
Çiçək ləçəklərini xatırladan qanadlar, qar dənələrindən ilhamlanan detallar, parlaq metal elementlər və cəsarətli rəng seçimləri podiumun əsas vizual xüsusiyyətləri olub. Ənənəvi alt paltarı kolleksiyaları ilə səhnə teatrallığını birləşdirən nümayiş, Victoria’s Secret-in illərdir qoruduğu dəbdəbəli moda şousu üslubunu yenidən ön plana çıxarıb .
2026-cı il şousunda müxtəlif nəsillərdən və yaş qruplarından olan modellər bir araya gəlib. Təcrübəli podium ulduzları ilə yanaşı, son illərdə moda dünyasında diqqət çəkən yeni simalar da nümayişdə iştirak ediblər. Bella Hadid gecənin ən çox diqqət çəkən modellərindən biri olub. O, yaşıl alt paltarı, əhəng yaşılı mini yubkası və çiçəklərlə bəzədilmiş, sarmaşığı xatırladan qanadları ilə podiuma çıxıb. Modelin görünüşündə sarı saçlar və bronz tonlu makiyaj da xüsusi yer tutub.
Onun bacısı Gigi Hadid isə çəhrayı rəngli obrazı və çiçək motivli üst geyimi ilə diqqət çəkib. Model daha sonra ağ mini don və həcmli, tüklü qanadlarla da podiumda görünüb. Gigi-nin Tate McRae ilə eyni podiumda yer alması gecənin maraqlı məqamlarından birinə çevrilib. Victoria’s Secret-in ən tanınmış simalarından dünyaca məşhur Adriana Lima da şouda iştirak edib. Onunla yanaşı, Alessandra Ambrosio, Candice Swanepoel, Elsa Hosk, təxmini üç həftə əvvəl ana olan Barbara Palvin və Rosie Huntington-Whiteley kimi məşhur modellər də podiuma qayıdıblar.
Gecənin model heyətində, həmçinin Anok Yai, Ashley Graham, Alex Consani, Paloma Elsesser, Imaan Hammam, Liu Wen, Joan Smalls, Cindy Bruna, Amelia Gray, Abby Champion, Devyn Garcia, Ming Xi və Precious Lee yer alıblar.
Xüsusilə Rosie Huntington Whiteley-nin uzun fasilədən sonra Victoria’s Secret podiumuna qayıtması diqqət çəkib. Müxtəlif nəsilləri təmsil edən modellərin iştirakı brendin keçmişi ilə müasir moda istiqamətləri arasında ayrılmaz əlaqəni bir daha nümayiş etdirib .
Kylie Jenner və 50 milyon dollarlıq “Fantasy Bra” gecənin ən çox müzakirə olunan hadisələrindən biri Kylie Jenner-in Victoria’s Secret podiumunda debütü olub. O, səkkizillik fasilədən sonra yenidən nümayişə qaytarılan əfsanəvi Fantasy Bra ilə səhnəyə çıxıb.
Təxminən 50 milyon dollar dəyərində təqdim edilən bu xüsusi dizayn 2018-ci ildə isveçli model Elsa Hosk tərəfindən nümayiş etdirilmişdi. Kylie Jenner-in həmin obrazla podiuma çıxması tədbirin ən yaddaqalan anlarından birinə çevrilib.
Onun ailəsi və yaxınları da gecədə iştirak ediblər. Anası Kris Jenner və aktyor Timothée Chalamet tamaşaçılar arasında yer alıblar. Beləliklə, şou yalnız moda nümayişi deyil, həm də məşhurların diqqət mərkəzində olduğu böyük bir əyləncə hadisəsinə çevrilib.
Bu il Victoria’s Secret musiqi proqramında yalnız qadın ifaçılara yer verib. Dörd fərqli musiqi istiqamətini birləşdirən heyət gecənin ritmini müəyyənləşdirib.
Megan Moroney şounun açılışında parlaq gitara, çəhrayı qanadlar və diqqətçəkən səhnə obrazı ilə çıxış edib. Onun görünüşündə çəhrayı rəng və parıltılı detallar üstünlük təşkil edib.
Tate McRae qırmızı, korset üslublu geyimi, uyğun ayaqqabıları və yüngül tül qanadları ilə səhnəyə çıxıb. İfaçının çıxışı zamanı Gigi Hadid ilə eyni podiumda görünməsi musiqi ilə modanın birləşdiyi maraqlı anlardan biri olub.
K-pop qız qrupu KATSEYE isə PINK kolleksiyasına həsr olunmuş hissədə çıxış edib. Qrup üzvləri çəhrayı və qara rənglərdə korsetlər, tor corablar və müxtəlif dekorativ aksesuarlarla hazırlanmış obrazlar geyiniblər. Onların viral hitə çevrilən “Pinky Up” mahnısını ifa etməsi şounun daha gənc və enerjili hissəsinə xüsusi rəng qatıb.
Gecənin diqqət çəkən ifaçılarından biri də Megan Thee Stallion olub. Gümüşü metal qanadlar, parıltılı üst geyim və futuristik çılğın səhnə obrazı ilə çıxış edən müğənni “Body” də daxil olmaqla hit mahnılarını səsləndirib. Onun çıxışı şounun ən dinamik məqamlarından biri kimi yadda qalıb və bütün zalı coşdurmağı bacarıb.
Yeni mələk Solange Omon-un böyük debütü 2026-cı il şousunun ən əlamətdar hadisələrindən biri də yeni Victoria’s Secret mələyinin təqdimatı olub. Kamerunda doğulan və ABŞ-ın Men ştatında yaşayan 21 yaşlı Solange Omon minlərlə namizəd arasından seçilərək brendin yeni simasına çevrilib.
Onun seçim prosesi “Angels Among Us” adlı YouTube sənədli layihəsində izləyicilərə təqdim edilib. Layihə çərçivəsində namizədlər kastinq mərhələlərindən keçib, podium hazırlığı, fotosessiyalar və müxtəlif təlimlərdə iştirak ediblər. Omon əvvəllər qeyri-kommersiya təşkilatlarında çalışıb, gənclərə və immiqrant ailələrindən olan uşaqlara dəstək göstərib. Modelin qalibiyyəti ona “IMG Models” agentliyi ilə eksklüziv müqavilə də qazandırıb. Onun seçilməsi Victoria’s Secret-in yeni simalar kəşf etmək və daha geniş namizəd auditoriyasına imkan yaratmaq istiqamətində atdığı addımların davamı kimi qiymətləndirilə bilər. 2026-cı il nümayişinin başqa bir mühüm xüsusiyyəti onun Los-Ancelesdə keçirilməsi olub. Son iki ildə Nyu-Yorkda təşkil edilən şou bu dəfə Kaliforniyaya qayıdaraq yeni məkan və fərqli atmosfer təqdim edib.
1995-ci ildə başlayan Victoria’s Secret Fashion Show illər ərzində moda dünyasının ən tanınan tədbirlərindən birinə çevrilib. London, Paris və Şanxay kimi şəhərlərdə keçirilən nümayişlər brendin beynəlxalq nüfuzunu gücləndirib. Bununla belə, şounun əsas fərqləndirici cəhəti həmişə dəbdəbəli alt paltarı kolleksiyalarını musiqi, səhnə sənəti və məşhur modellərlə birləşdirməsi olub.
Brendin son illərdəki yenilənmə strategiyası da diqqət çəkir. Müxtəlif bədən quruluşlarına və fərqli moda üslublarına sahib modellərin iştirakı, eləcə də yeni simaların seçilməsi nümayişin müasir auditoriya ilə əlaqəsini gücləndirməyə xidmət edir.
Nəticə etibarilə, Victoria’s Secret Fashion Show 2026 məşhur modellərin geri dönüşlərini, Kylie Jenner-in Fantasy Bra ilə debütünü, yeni mələk Solange Omon-un təqdimatını və dörd qadın ifaçının musiqili çıxışlarını bir araya gətirib. Dörd fəsildən ilhamlanan konsepsiyası və Los-Ancelesə dönüşü ilə tədbir brendin ənənəvi dəbdəbəsini müasir moda və pop-mədəniyyətlə birləşdirən növbəti böyük nümayiş kimi yadda qaldı.
Discover more from Dynamix Magazine
Subscribe to get the latest posts sent to your email.