“Sanki romantik bir komediya filmindən çıxıb Kolmar” — şübhəsiz ki, şəhərin bizdə yaratdığı ilkin təəssürat tam olaraq bu ifadə ilə izah olunur. Fransanın şimal-şərqində, Elzas (Alsace) bölgəsində yerləşən bu şəhər alman və fransız memarlıq üslubunun sintezi kimi qarşımıza çıxır. Şəhərə daxil olduğunuz ilk andan etibarən özünüzü uşaq vaxtı sevərək dinlədiyiniz nağıllardakı qəhrəmanlar kimi hiss etməyə başlayırsınız.
Qiymətlər ətraf ərazilərlə müqayisə edildikdə daha münasibdir. “Balaca Venesiya”nın yaxınlığında yerləşən Marché Couvert (Qapalı Bazar) Kolmarın ən məşhur bazarı hesab olunur. Bazarın daxilində müxtəlif pendir növləri, özünəməxsus fransız çörəkləri və bir çox yerli məhsullar vitrinləri bəzəyir. Burada gəzərək yeni dadlar kəşf etmək, dost-tanış üçün ləzzətli hədiyyələr seçmək mümkündür.
Şəhərdə bir neçə restoran seçimi mövcuddur. Hətta bunlardan bəziləri — Restaurant Girardin, L’Atelier du Peintre və JY’s — Mişlen (Michelin) ulduzu almış restoranlardır. Restoranların zəngin fransız üslubunda hazırlanan təamları qonaqların bu məkanları seçməsində əsas amillərdən biridir. Məsləhət olaraq qeyd edək ki, restoranlara getməzdən əvvəl rezervasiya etdirmək daha məqsədəuyğundur, əks halda boş yer tapmaq çətin ola bilər.
Kolmar balaca bir şəhər olduğundan, hər bir guşəsini detallı şəkildə gəzib kəşf etmək digər böyük Avropa şəhərləri ilə müqayisədə daha asandır. Təqribən 65–70 min əhalinin yaşadığı bu şəhər, xüsusilə xüsusi günlərdə turistlərlə birlikdə kifayət qədər izdihamlı olur. Şəhərin içindən keçən kiçik kanallara görə Kolmar “Balaca Venesiya” da adlandırılır. Bu kanallar şəhərə xüsusi gözəllik qatır və gələn turistlərin böyük marağına səbəb olur. Ziyarətçilər 20–25 dəqiqə davam edən qayıq turlarından məmnuniyyətlə istifadə edirlər. Bu tur zamanı qarşılaşılan mənzərələr telefonu əldən yerə qoymağa imkan vermir.
Yalnız qayıq turu deyil, şəhərin əsas mərkəzi küçələri də tam mənada açıq hava foto-studiyası təsiri bağışlayır. Şəkillərin fonunda çox vaxt rəngarəng və fərqli üslubda inşa edilmiş evlər görünür. Əslində bu evlərlə bağlı maraqlı faktlar da mövcuddur. Onlardan biri bəzi evlərin pəncərələrində kiçik ürək formasının yerləşdirilməsidir. Məlum olur ki, bu evlər evlənmək istəyən xanımlara aid olub. Evləndikdən sonra isə ürək formasını pəncərələrində üçbucaq forma ilə əvəz edirmişlər. Digər maraqlı fakt isə evlərin rənglərinin mənası ilə bağlıdır. Belə ki, mavi evlər balıqçılara, qırmızı evlər qəssablara, sarı evlər isə şirniyyatçılara aid olub. Hətta Kolmarın ən köhnə evi kimi tanınan bina da ziyarətçilərin xüsusi diqqətini cəlb edir.
“Harada qala bilərik?” sualının cavabı isə olduqca sadədir.
Avropanın bir çox şəhəri ilə müqayisədə Kolmarda turistlər üçün geniş seçim imkanları mövcuddur. Şəhər mərkəzində yerləşən orta qiymətli butik otellər, köhnə binalarda yerləşən apartamentlər və Airbnb variantları səyahətçilərin ixtiyarına verilir.
Kolmarın ən gözəl dövrü isə məhz dekabr–yanvar ayları hesab olunur. Bu aylarda şəhər tam mənası ilə kiçik bir Yeni il kəndinə çevrilir. Müxtəlif yarmarkalar qurulur, hər tərəf işıqlarla bəzədilir və şəhər insanlarla dolub-daşır. Hətta bu yarmarkalar Avropanın ən yaxşı Milad bazarları sırasında göstərilir. Bütün bu müsbət xüsusiyyətlər Kolmarı həm yay, həm də qış aylarında canlı və cazibədar saxlayır.
Kolmar ilə bağlı sosial media platformalarında mövcud olan hesablar da aktiv şəkildə istifadə olunur. Şəhərə səfər edən qonaqlar bu paylaşımların altında öz təcrübələrini bölüşürlər. Kolmarın turistik baxımdan tanıdılması və daha da inkişaf etdirilməsi üçün rəsmi saytlar və məlumat platformaları da mövcuddur.