Azərbaycan Fashion Week-in üçüncü günü musiqi, yüksək moda və beynəlxalq dizaynların vəhdəti ilə yadda qaldı. Günün proqramı həm yerli, həm də xarici brendlərin fərqli estetik baxışlarını bir podiumda birləşdirərək tamaşaçılara unudulmaz moda təcrübəsi yaşatdı.
Gecənin açılışı gənc ifaçı Camal Qasımovun canlı performansı ilə başladı. Sənətçi sevilən iki mahnısını səsləndirərək salonu yüksək enerji ilə doldurdu və podium nümayişləri üçün xüsusi atmosfer yaratdı.
İlk olaraq podiuma Sameera çıxdı. Brendin kolleksiyası modern couture estetikasını işığın parıltısı və materialların tekstura kontrastı üzərində qurmuşdu. Şəffaf mesh tül üzərində işlənmiş saçaq və sekvin detallar modellərin hər addımında dinamik işıq oyunu yaradırdı. Yüksək yaxalı ilüziya kəsimləri və cəsarətli yarıqlar klassik gecə libaslarını müasir baxışla yenidən şərh edirdi. Gümüşü, şampan və pastel tonların üstünlük təşkil etdiyi rəng palitrası 3D gül aplikasiyaları ilə tamamlanaraq kolleksiyaya romantik və zərif görünüş qazandırmışdı. İpək və saten parçalarla hazırlanan rahat siluetli dəstlər isə gündəlik dəbdəbə anlayışını incə detallarla ifadə edirdi. Nəticədə Sameera mürəkkəb əl işçiliyini vizual yüngüllüklə uğurla bir araya gətirən kolleksiya təqdim etdi.
Podium daha sonra Özbəkistanı təmsil edən Shakiadore brendinə həvalə olundu. Təqdim olunan Talisman kolleksiyası işıq və kölgənin qarşılıqlı təsiri üzərində qurularaq fərqli vizual effektlər yaradırdı. Qara tonların dominant olduğu libaslarda qızılı botanika motivləri və rəngarəng spiral naxışlar diqqəti cəlb edən əsas elementlər idi. Strapless korsetli modellərdən axıcı xələt formalı geyimlərə qədər müxtəlif siluetlər brendin yaradıcı imkanlarını nümayiş etdirirdi. Minimalist ağ libaslar dramatik kəsimlərlə balans yaradarkən, baş örtüyü kimi istifadə olunan ağ yaylıqlar kolleksiyaya müasir və fərqli xarakter əlavə edirdi.
Növbəti təqdimat Khayaly Couture brendinə məxsus idi. Avanqard estetikanı ön plana çıxaran kolleksiya memarlıq üslubunda hazırlanmış kəsimləri ilə seçildi. Həcmli orqanza formaları, buludvari drapajlar və iri çiyin konstruksiyaları geyimləri sanki podium üzərində heykəltəraşlıq əsərlərinə çevirirdi. Şəffaf tül üzərindəki iri 3D çiçək aplikasiyaları, sekvin və lələk detalları tekstura baxımından kolleksiyanı daha da zənginləşdirirdi. Müasir gəlinlik interpretasiyası, mini siluetlər, şəffaf duvaqlar və asimmetrik drapajlar klassik bridal dəbini cəsarətli formada yenidən təqdim edirdi. Metalik lila, açıq mavi və pastel tonların saten və tüllə harmoniyası kolleksiyaya nağılvari, eyni zamanda futuristik ruh bəxş edirdi.
Ara şousunda isə sevilən rus sənətçi Brandon Stone səhnə aldı.
Günün final nümayişi isə məşhur rus moda evi Valentin Yudashkin tərəfindən təqdim olundu. Brend neoklassik romantizmi müasir Ready-to-Wear Couture yanaşması ilə birləşdirərək podiuma zərif və eleqant kolleksiya çıxardı. Slip dress modellərindən həcmli bubble-hem yubkalara, korse və geniş şalvar kombinasiyalarına qədər müxtəlif siluetlər kolleksiyanın dinamikliyini artırırdı. İpək, tül, saten və jakard parçalar sekvin və iri aplikasiyalarla tamamlanaraq zəngin tekstura oyunu yaradırdı. Krem, fil sümüyü, açıq mavi, pastel çəhrayı və gümüşü tonlar romantik atmosfer formalaşdırır, bədənə oturan minimalist kəsimlər isə həcmli drapajlarla balanslaşdırılaraq müasir zərifliyi ön plana çıxarırdı. Kolleksiya Valentin Yudashkin moda evinin illərlə formalaşdırdığı yüksək əl işçiliyini və incə estetik üslubunu bir daha nümayiş etdirdi.
Azərbaycan Fashion Week-in üçüncü günü isə musiqi ilə yekunlaşdı. Gecənin finalında səhnəyə çıxan TuralTuranX qardaşları canlı performansları ilə tədbirə yüksək enerji qataraq moda həftəsinin ən yaddaqalan axşamlarından birinə imza atdılar.